સ્થાનિક સ્વરાજ્યની ચૂંટણી: જિલ્લા ચૂંટણી અધિકારીએ કલોલ, માણસા અને દહેગામ તાલુકાના કેન્દ્રોનું નિરીક્ષણ કર્યું

ગાંધીનગર જિલ્લામાં આગામી સ્થાનિક સ્વરાજ્યની ચૂંટણીઓને અનુલક્ષીને વહીવટી તંત્ર સંપૂર્ણપણે સજ્જ બન્યું છે. જિલ્લા ચૂંટણી અધિકારી અને કલેક્ટર શ્રી રવિન્દ્ર ખતાલેએ કલોલ, માણસા અને દહેગામ તાલુકાઓની રૂબરૂ મુલાકાત લઈને ચૂંટણીલક્ષી તૈયારીઓ, સુરક્ષા વ્યવસ્થા અને વ્યવસ્થાપનનું સઘન નિરીક્ષણ કર્યું હતું.

કલોલ તાલુકામાં ચૂંટણી પ્રક્રિયાના સુચારૂ સંચાલન માટે કલેક્ટરશ્રીએ સ્વામિનારાયણ હાઈસ્કુલ, સઈજ ગુરૂકુલ તથા સેંટ ઝેવિયર્સ હાઈસ્કૂલ ખાતેના સ્ટ્રોંગરૂમ અને ડિસ્પેચીંગ સેન્ટરની મુલાકાત લીધી હતી. તેમણે મતદાન મથકો સુધી સામગ્રી પહોંચાડવાની પ્રક્રિયા અને સુરક્ષાના કડક અમલીકરણ અંગે અધિકારીઓને જરૂરી માર્ગદર્શન પૂરું પાડ્યું હતું.

ત્યારબાદ માણસા તાલુકામાં ચૂંટણી પ્રક્રિયાને પારદર્શી બનાવવાના હેતુ સાથે શેઠ એલ.એચ સાયન્સ કોલેજ ખાતે સમીક્ષા કરવામાં આવી હતી. કલેક્ટરશ્રીએ અહીં સૂચિત મતગણતરી કેન્દ્ર અને સ્ટ્રોંગરૂમની સ્થિતિનું નિરીક્ષણ કર્યું હતું અને શાંતિપૂર્ણ વાતાવરણમાં મતદાન સંપન્ન થાય તેમજ ચૂંટણી સ્ટાફને કોઈ મુશ્કેલી ન પડે તે માટે સ્થાનિક તંત્રને જરૂરી સૂચનાઓ આપી હતી.

દહેગામ તાલુકામાં પણ તૈયારીઓને આખરી ઓપ આપવા માટે કલેક્ટરશ્રીએ એમ.બી કોમર્સ એન્ડ શ્રી જી.એમ.એન. લાલજી આર્ટ્સ કોલેજ તથા મ્યુનિસિપલ બોઈજ હાઈસ્કૂલ ખાતે સ્ટ્રોંગ રૂમ, ડિસ્પેચિંગ સેન્ટર અને મતગણતરી કેન્દ્રની મુલાકાત લીધી હતી. આ ઉપરાંત, મતગણતરીના દિવસે કાયદો અને વ્યવસ્થા જળવાઈ રહે તે માટે અધિકારીઓ સાથે સંકલન સાધીને ચુસ્ત સુરક્ષા વ્યવસ્થા ગોઠવવા તેમણે તાકીદ કરી હતી. આમ, સમગ્ર જિલ્લામાં ચૂંટણી પ્રક્રિયા મુક્ત અને ન્યાયી વાતાવરણમાં યોજાય તે માટે વહીવટી તંત્ર દ્વારા ઝીણવટભરી તૈયારીઓ કરવામાં આવી રહી છે.