ગિફ્ટ સિટી નજીક 190 કરોડનું જમીન કૌભાંડમાં કૌશિક વઘાસિયા સામે ગુનો દાખલ, મોટા માથાઓ સંડોવણીની ચર્ચા

ગાંધીનગર : ગાંધીનગર ગિફ્ટ સિટીને અડીને આવેલા રતનપુર ગામની સીમમાં અંદાજે 190 કરોડ રૂપિયાની માર્કેટ વેલ્યુ ધરાવતી 18 વીઘા જમીન ખોટા દસ્તાવેજોના આધારે પચાવી પાડવાના મસમોટા કૌભાંડનો પર્દાફાશ થયો છે. કલેક્ટર ગાંધીનગરની તપાસ બાદ ડભોડા પોલીસ સ્ટેશનમાં અમદાવાદના કૌશિક સવજીભાઈ વઘાસિયા સહિત સંડોવાયેલા શખ્સો સામે લેન્ડ ગ્રેબિંગનો ગુનો નોંધવામાં આવ્યો છે.
મળતી માહિતી મુજબ ખેડા જિલ્લાના વસો તાલુકાના રામપુરા ગામના 74 વર્ષીય NRI ખેડૂત પ્રભુદાસ જેસંગભાઈ પટેલે વર્ષ 2007માં રતનપુર ગામની સીમમાં આવેલી જમીન ખરીદી હતી. જમીનનો કબજો અને તમામ રેવન્યુ રેકોર્ડ તેમના નામે ચાલતા હોવા છતાં વર્ષ 2024 દરમિયાન અજાણ્યા શખ્સોએ ખોટી પાવર ઓફ એટર્ની બનાવી જમીનનો વેચાણ દસ્તાવેજ તૈયાર કરી દીધો હોવાનું સામે આવ્યું હતું.
આરોપ છે કે કૌશિક સવજીભાઈ વઘાસિયાએ ખેડૂતની બનાવટી સહીઓ કરીને નકલી પાવર ઓફ એટર્ની તૈયાર કરાવી, તેને નોટરાઈઝ કરાવી અને કોઈપણ નાણાંકીય ચુકવણી કર્યા વિના જમીન પોતાના નામે કરાવવાનો કાવતરું રચ્યું હતું. એટલું જ નહીં, ખેડૂત હયાત હોવા છતાં તેમના નામે ખોટું સોગંદનામું પણ તૈયાર કરી નોટરાઈઝ કરવામાં આવ્યું હોવાનું તપાસમાં સામે આવ્યું છે.
ભોગ બનનાર ખેડૂત દ્વારા કલેક્ટર ગાંધીનગર અને જમીન તકેદારી સમિતિ સમક્ષ લેન્ડ ગ્રેબિંગની ફરિયાદ કરવામાં આવી હતી. તપાસના અંતે સમગ્ર કૌભાંડના પુરાવા સામે આવતા કલેક્ટરના આદેશથી ડભોડા પોલીસ સ્ટેશનમાં લેન્ડ ગ્રેબિંગનો ગુનો દાખલ કરવામાં આવ્યો છે.
મહત્વની બાબત એ છે કે અગાઉ ખોટા દસ્તાવેજોના ગુનામાં ચાર્જશીટ પણ દાખલ થઈ ચૂકી છે. જોકે લેન્ડ ગ્રેબિંગ અંગે અલગ ફરિયાદ ન નોંધાતા પીડિત પક્ષે હાઈકોર્ટનો દરવાજો ખટખટાવ્યો હતો. હાઈકોર્ટના નિર્દેશ બાદ આખરે નવા નિયુક્ત કલેક્ટરના આદેશથી લેન્ડ ગ્રેબિંગનો ગુનો નોંધાયો છે.
સૂત્રોના જણાવ્યા અનુસાર આ કરોડોની જમીન કૌભાંડમાં માત્ર એક વ્યક્તિ નહીં પરંતુ મોટા ગજાના બિલ્ડર સહિત અન્ય પ્રભાવશાળી લોકોની સંડોવણી હોવાની શક્યતા વ્યક્ત કરવામાં આવી રહી છે. જો રાજ્ય સરકાર દ્વારા વિશેષ તપાસ ટીમ (SIT) રચી ઊંડાણપૂર્વક તપાસ કરવામાં આવે તો અનેક ચોંકાવનારા ખુલાસા થઈ શકે છે.