ગાંધીનગરના યુવાનો માટે લશ્કરી અને પોલીસ દળોમાં જોડાવાની સુવર્ણ તક

ભારતીય આર્મી, એરફોર્સ, નેવી, પેરા મિલિટરી ફોર્સ તથા પોલીસ ફોર્સમાં જોડાઈને દેશસેવા કરવા ઈચ્છતા ગાંધીનગર જિલ્લાના યુવાનો માટે જિલ્લા રોજગાર કચેરી દ્વારા એક મહત્વપૂર્ણ આયોજન કરવામાં આવ્યું છે. જિલ્લાના દેશદાઝ ધરાવતા અપરિણિત અને શારીરિક રીતે સશક્ત પુરુષ ઉમેદવારો માટે ‘સ્વામી વિવેકાનંદ પૂર્વ સંરક્ષણ નિવાસી તાલીમ યોજના’ અંતર્ગત વિનામૂલ્યે નિવાસી તાલીમ વર્ગ શરૂ થવા જઈ રહ્યો છે, જેમાં ઉમેદવારોને શારીરિક અને માનસિક ક્ષમતા વર્ધક ઘનિષ્ઠ તાલીમ આપવામાં આવશે.

આ નિવાસી તાલીમ વર્ગમાં જોડાવા માટે શારીરિક યોગ્યતા ધરાવતા અને ધોરણ ૧૦ પાસ હોય તેવા ઉમેદવારો માટે વયમર્યાદા ૧૭.૫ વર્ષ (સત્તર વર્ષ અને છ માસ) થી ૨૧ વર્ષ તેમજ ધોરણ ૧૨ પાસ ઉમેદવારો માટે ૧૭.૫ વર્ષથી ૨૩ વર્ષ નક્કી કરવામાં આવી છે. આ તાલીમ અંતર્ગત લશ્કરી ભરતીને અનુરૂપ ઊંચાઈ, વજન અને છાતીના માપદંડો ઉપરાંત દોડ, લાંબો કૂદકો અને પુલ-અપ્સ વગેરેની ફિઝિકલ ઇન્સ્ટ્રકટર દ્વારા સઘન શારીરિક તાલીમ આપવામાં આવશે. આ સાથે જ નિષ્ણાત વ્યાખ્યાતાઓ દ્વારા અંગ્રેજી, ગણિત, વિજ્ઞાન અને સામાન્ય જ્ઞાન જેવા વિષયોની લેખિત પરીક્ષા માટેની ઘનિષ્ઠ તૈયારી પણ કરાવવામાં આવશે. તાલીમાર્થીઓ માટે અહીં રહેવા તથા જમવાની સવલત સંપૂર્ણપણે વિનામૂલ્યે રાખવામાં આવી છે, એટલું જ નહીં પરંતુ પસંદગી પામેલ ઉમેદવારોને તાલીમ દરમિયાન તેમની હાજરીને અનુરૂપ સરકારશ્રીના પ્રવર્તમાન નિયમોનુસાર પ્રતિદિન ૧૦૦ રૂપિયા લેખે સ્ટાઈપેન્ડ પણ ચૂકવવામાં આવશે. આ તાલીમ માટેની પસંદગી યાદી રોજગાર કચેરી દ્વારા તૈયાર કરવામાં આવશે, જેથી રસ ધરાવતા ઉમેદવારોએ નિયત નમૂનાના ફોર્મ અને સંમતિપત્રક સાથે શાળા છોડ્યાનું પ્રમાણપત્ર, ધોરણ-૧૦, ૧૨ અથવા ગ્રેજ્યુએશનની માર્કશીટની નકલ, આધારકાર્ડ, બેંક પાસબુકની નકલ, જાતિનો દાખલો અને એક પાસપોર્ટ સાઈઝનો ફોટો જેવા જરૂરી દસ્તાવેજો જોડવાના રહેશે.

આ તમામ આધાર-પુરાવા સાથેના ફોર્મ કચેરીના કામકાજના દિવસોમાં તા. ૩૧/૦૮/૨૦૨૬ ના રોજ સાંજના ૦૫:૦૦ વાગ્યા સુધીમાં “જિલ્લા રોજગાર કચેરી, ‘સી’ વિંગ, પહેલો માળ, સહયોગ સંકુલ, પથિકાશ્રમની બાજુમાં, સિવિલ હોસ્પિટલની સામે, સેક્ટર-૧૧, ગાંધીનગર” ખાતે જમા કરાવવાના રહેશે. આ તાલીમ અંગેના કોઈપણ ફેરફાર બાબતે જિલ્લા રોજગાર વિનિમય કચેરી, ગાંધીનગરનો નિર્ણય આખરી રહેશે.તેમ રોજગાર અધિકારીશ્રી ગાંધીનગરની યાદીમાં જણાવાયું છે.