ગાંધીનગર મનપા ચૂંટણી: ભાજપના ૪૪ ઉમેદવારોએ ભર્યું નામાંકન
ગાંધીનગર મહાનગર ભાજપા મીડિયા વિભાગની અખબારી યાદી જણાવે છે કે, ગાંધીનગર મહાનગરપાલિકા ચૂંટણી-૨૦૨૬ અંતર્ગત ભારતીય જનતા પાર્ટીના તમામ ૧૧ વોર્ડના ૪૪ ઉમેદવારશ્રીઓએ આજે વિકાસ, જનસેવા અને સુશાસનના સંકલ્પ સાથે તેમજ જનતાના આશીર્વાદ, કાર્યકરોની અવિરત મહેનત અને સંગઠનની સંગઠિત શક્તિના બળે ભવ્ય વિજયના આત્મવિશ્વાસ સાથે ઉત્સાહભેર નામાંકન દાખલ કર્યું હતું.
ગાંધીનગર મહાનગરપાલિકાના વોર્ડ નંબર ૧ થી ૪ના ભાજપાના ઉમેદવારશ્રીઓએ જિલ્લા પંચાયત કચેરી ખાતે, જ્યારે વોર્ડ નંબર ૫ થી ૧૧ના ભાજપાના ઉમેદવારોએ જિલ્લા સેવા સદન (કલેક્ટર કચેરી) ખાતે ઉમેદવારી પત્રક ભર્યા હતા. ભાજપાના ઉમેદવારો પોતાના વિસ્તારના કાર્યકરો, આગેવાનો તથા મોટી સંખ્યામાં શુભેચ્છકો સાથે પહોંચ્યા હતા. ઉમેદવારી નોંધાવવાના આ પ્રસંગે કાર્યકરો અને શુભેચ્છકોમાં વિશેષ ઉત્સાહ જોવા મળ્યો હતો. વિવિધ વોર્ડમાંથી મોટી સંખ્યામાં કાર્યકરો ઉમેદવારશ્રીઓ સાથે જોડાયા હતા. સમગ્ર વાતાવરણ વંદે માતરમ્ અને ભારતમાતા કી જય ના જયઘોષ સાથે ગુંજી ઉઠ્યું હતું.
આ પ્રસંગે શહેર ભાજપ અધ્યક્ષશ્રી ડૉ. આશિષકુમાર દવે, મહાનગરના પ્રભારી શ્રી નીરવભાઈ અમીન, મેયર શ્રીમતી મીરાબેન પટેલ, ધારાસભ્યશ્રીઓ શ્રીમતી રીટાબેન પટેલ, શ્રી અલ્પેશજી ઠાકોર સહિત ભાજપા આગેવાનોએ સૌ ઉમેદવારોને ભવ્ય વિજયની શુભકામનાઓ પાઠવી હતી.
