ઓડિશા અને પંજાબ પછી મહારાષ્ટ્રએ પણ 30 એપ્રિલ સુધી લોકડાઉન વધાર્યું

નવી દિલ્હી :

ઓડિશા અને પંજાબ પછી મહારાષ્ટ્રએ પણ લોકડાઉન 30 એપ્રિલ સુધી વધારવાનો નિર્ણય લીધો છે. મુખ્યમંત્રી ઉદ્ધવ ઠાકરેએ શનિવારે તેની જાહેરાત કરી હતી. મુખ્યમંત્રી ઉદ્ધવે કહ્યું કે, મહારાષ્ટ્રમાં લોકડાઉન 30 એપ્રિલ સુધી ચાલુ રહેશે.

આવી મુશ્કેલ પરિસ્થિતિમાં પણ આપણે દેશને રસ્તો બતાવવામાં પાછળ હટશું નહીં. રાજ્યમાં કોરોના વાયરસના 1,874 કેસ નોંધાયા છે અને અહીં 110 દર્દીઓનાં મોત નીપજ્યાં છે.

લોકડાઉન વધારવાની ઘોષણા કરતા મુખ્ય પ્રધાન ઉદ્ધવે કહ્યું કે, સોમવારે મહારાષ્ટ્રમાં કોરોનાનો પહેલો કેસ મળી આવતાં 5 અઠવાડિયા થશે. જો કે આજે આપણે કહી શકીએ કે આપણે કોરોનાની વૃદ્ધિ ઘણી હદે રોકી છે.

કોરોના વાયરસથી દેશમાં મહારાષ્ટ્રને સૌથી વધુ અસર થઈ છે. શનિવાર સુધીમાં, રાજ્યમાં 1,874 દર્દીઓ મળી આવ્યા છે, જેમાંથી 188 જેટલા દર્દીઓ સ્વસ્થ થયા છે અને તેમના ઘરે ગયા છે.

એકલા મુંબઇમાં જ લગભગ 1000 દર્દીઓ

મહારાષ્ટ્રના કોરોનામાં સૌથી વધુ અસરગ્રસ્ત શહેર મુંબઇ શહેર રહ્યું છે. શુક્રવારે એક જ દિવસમાં મુંબઇમાં અહીં કોરોનાના 218 નવા કેસ નોંધાયા છે. તેમજ 10 કોરોના દર્દીઓ મૃત્યુ પામ્યા.

મુંબઈ શહેરમાં જ કોરોનાને કારણે અત્યાર સુધીમાં કુલ 64 લોકોનાં મોત નીપજ્યાં છે. શુક્રવાર સુધીમાં મુંબઈમાં કોરોના ચેપનો કુલ આંક 993 પર પહોંચી ગયો છે.