ISRO ની મદદથી બનાવ્યું ખાસ ટ્રાન્સમીટર, બટન દબાવતા જ કોસ્ટગાર્ડ કરશે મદદ

પોરબંદર:ગુજરાતમાં 1600 કિ.મી. લાંબા દરિયાકાંઠે મત્સ્યોદ્યોગ ધમધમી રહ્યો છે. આ ઉદ્યોગ સરકારને કરોડો રૂપીયાનું હુંડીયામણ રળી આપે છે અને સાથોસાથ અનેક લોકોને રોજગારીની તકો પણ પૂરી પાડે છે. મત્સ્યોદ્યોગને પ્રોત્સાહન આપવા તેમજ દરિયામાં બનતા અકસ્માતોને અટકાવવા માટે અને મદદરૂપ થવા માટે ઈસરોની મદદથી ખાસ ડિસ્ટ્રેસ એલર્ટ ટ્રાન્સમીટર બનાવ્યું છે જે ટ્રાન્સમીટર બોટમાં લગાવવાથી આફતના સમયે માત્ર બટન દબાવવાથી સુરક્ષા એજન્સીઓ તેમની મદદે પહોંચી જશે.

ગુજરાતના માચ્છીમારો જ્યારે દરિયામાં માચ્છીમારી કરવા માટે જાય તે સમયે બોટમાં આગની ઘટના બને, અથવા તો બોટ ડૂબવાની સ્થિતિમાં હોય તેમજ ખલાસી બિમાર હોય આવા સમયે માચ્છીમારોને મદદ મળતી નથી જેને કારણે મોટું આર્થિક નુકસાન થાય છે તો કેટલાક કિસ્સાઓમાં માચ્છીમારોને જીવ પણ ગુમાવવો પડે છે. માચ્છીમારોને મધદરિયે મદદ મળી રહે તે માટે ઈસરોની મદદથી ડિસ્ટ્રેસ એલર્ટ ટ્રાન્સમીટર બનાવવામાં આવ્યું છે. બોટમાં જો આ ડિસ્ટ્રેસ એલર્ટ ટ્રાન્સમીટર લગાવવામાં આવ્યું હોય તો તેનું બટન દબાવતા જ કોસ્ટગાર્ડ તેમની મદદે પહોંચી જાય છે.

આ ડિસ્ટ્રેસ ટ્રાન્સમીટરની કિંમત અંદાજે 11,000 રૂપીયા જેવી છે જેમાં સરકાર 90 ટકા જેવી સબસીડી આપે છે જેમાં બોટ માલિકોએ માત્ર 1050 રૂપીયા જેવી જ રકમ ભરવાની રહે છે આ માટે ફિશરીઝ વિભાગમાં તેનું રજીસ્ટ્રેશન કરાવવામાં આવે છે અને ત્યારબાદ આ ડિસ્ટ્રેસ એલર્ટ ટ્રાન્સમીટર બોટમાં લગાવવામાં આવે છે. પોરબંદરમાં 2700 બોટોમાંથી 105 બોટોનું રજીસ્ટ્રેશન થઈ ગયું છે અને 20 બોટોમાં અત્યારસુધી કાર્યરત કરી દેવામાં આવ્યું છે. આ યોજના 31 માર્ચ સુધી સરકારની સબસીડીનો લાભ મળશે ત્યારબાદ મળશે નહીં તેવું મદદનીશ ફિશરીઝ અધિકારી આર.બી. બાજપાઈએ જણાવ્યું હતું.