જીએસટી કપાતનો લાભ ગ્રાહકોને જ મળશે: સરકારની કંપનીઓ પર કડક દેખરેખ.
કેન્દ્ર સરકારે બુધવારે (૩ સપ્ટેમ્બર) લગભગ ૪૦૦ વસ્તુઓ પર જીએસટી ઘટાડવાનો ઐતિહાસિક નિર્ણય લીધો છે. હવે આ ટેક્સ રાહતનો સીધો લાભ ગ્રાહકો સુધી પહોંચે તે સુનિશ્ચિત કરવા માટે સરકારે એક વિગતવાર દેખરેખ પદ્ધતિ તૈયાર કરી છે. આ નવી વ્યવસ્થા હેઠળ, સરકાર કંપનીઓ પર નજીકથી નજર રાખશે.
સૂત્રોના જણાવ્યા અનુસાર, પરોક્ષ કર વિભાગ હાલમાં બજારમાં પ્રવર્તમાન ભાવોનો ડેટા એકત્ર કરી રહ્યું છે. ૨૨મી સપ્ટેમ્બરથી નવા દરો અમલમાં આવ્યા બાદ આ ભાવોની નવા ભાવો સાથે સરખામણી કરવામાં આવશે. એક વરિષ્ઠ અધિકારીએ જણાવ્યું હતું કે, “કંપનીઓને કિંમતોમાં ગોઠવણ કરતા થોડા દિવસ લાગી શકે છે, પરંતુ સરકાર સતત નજર રાખશે કે આ લાભ વહેલી તકે ગ્રાહકોને મળે.”
સરકારનો આ નિર્ણય દર્શાવે છે કે તે જીએસટીના લાભોનો સીધો ફાયદો સામાન્ય જનતાને આપવા માટે પ્રતિબદ્ધ છે. આ દેખરેખ પદ્ધતિથી એવી ખાતરી આપવામાં આવશે કે કંપનીઓ ટેક્સ ઘટાડાનો લાભ પોતાના નફા માટે ન વાપરે અને તેનું વહન પ્રામાણિકતાથી ગ્રાહકો સુધી કરે.
