નવરાત્રિની મજા બગડશે? સૌરાષ્ટ્ર અને દક્ષિણ ગુજરાતમાં વરસાદની આગાહી
ગુજરાત સહિત સમગ્ર દેશમાં નવરાત્રિની ઉજવણી જોરશોરથી ચાલી રહી છે, ત્યારે ખેલૈયાઓ માટે એક માઠા સમાચાર આવ્યા છે. હવામાન વિભાગ દ્વારા આવતા અઠવાડિયાથી રાજ્યના કેટલાક વિસ્તારોમાં વરસાદની આગાહી કરવામાં આવી છે. ખાસ કરીને, સૌરાષ્ટ્ર અને દક્ષિણ ગુજરાતમાં વરસાદ પડી શકે છે.
હવામાન વિભાગના જણાવ્યા અનુસાર, મધ્ય બંગાળની ખાડી પર નીચા દબાણનો વિસ્તાર બનવાની સંભાવના છે, જે પશ્ચિમ તરફ આગળ વધશે. આ પ્રણાલીના કારણે ૨૬ સપ્ટેમ્બરથી ગુજરાતના વિવિધ જિલ્લાઓમાં વરસાદ શરૂ થઈ શકે છે.
૨૬ સપ્ટેમ્બરના રોજ, આણંદ, પંચમહાલ, દાહોદ, વડોદરા, છોટાઉદેપુર, નર્મદા, ભરૂચ, સુરત, તાપી, નવસારી, વલસાડ, રાજકોટ, જૂનાગઢ, અમરેલી, ભાવનગર, ગીર સોમનાથ અને બોટાદ જેવા જિલ્લાઓમાં હળવાથી મધ્યમ વરસાદ પડવાની શક્યતા છે. આ વરસાદ ગરબાના આયોજન અને ખેલૈયાઓની મજા બગાડી શકે છે.
