રસ્તા પર ગેરકાયદે પાર્કિંગનું સામ્રાજ્ય, તંત્રની મૌન સંમતિથી જનતા પરેશાન!
ગાંધીનગરમાં શાળા સત્ર શરૂ થતાં જ સ્ટેશનરી અને પુસ્તકોની દુકાનો બહાર ભારે ભીડ અને ટ્રાફિક જામના દૃશ્યો સર્જાયા છે. ખાસ કરીને પુનિત એમ્પોરિયમ સહિતની સ્ટેશનરી દુકાનો બહાર વાહનોનો ખડકલો થવાથી સામાન્ય નાગરિકો અને વાલીઓને ભારે હાલાકીનો સામનો કરવો પડી રહ્યો છે.
દુકાનદારો વેપાર કરવામાં એટલા વ્યસ્ત દેખાઈ રહ્યા છે કે જાહેર માર્ગો પર સર્જાતી અવ્યવસ્થા અને ટ્રાફિકની સમસ્યા તરફ તેમનું કોઈ ધ્યાન નથી. દુકાનો બહાર વાહનોની ગેરકાયદેસર પાર્કિંગ, રસ્તા પર ઉભેલી ભીડ અને અવરજવર માટે જગ્યા ન બચતાં સમગ્ર વિસ્તાર ટ્રાફિક જામમાં ફેરવાઈ ગયો છે.
સૌથી ચિંતાજનક બાબત એ છે કે આ સ્થિતિ સામે ટ્રાફિક પોલીસ અને સ્થાનિક તંત્ર પણ ઊંઘતું જણાઈ રહ્યું છે. દરરોજ હજારો લોકો આ માર્ગ પરથી પસાર થાય છે છતાં ટ્રાફિક વ્યવસ્થા જાળવવા માટે કોઈ અસરકારક કાર્યવાહી થતી જોવા મળતી નથી.
વાલીઓ પોતાના બાળકો સાથે પુસ્તકો અને શૈક્ષણિક સામગ્રી લેવા આવે છે, પરંતુ ખરીદી કરતાં વધુ સમય ટ્રાફિક અને પાર્કિંગની સમસ્યામાં બગાડવો પડે છે. જો કોઈ ઇમરજન્સી વાહનને પસાર થવું પડે તો ગંભીર પરિસ્થિતિ સર્જાઈ શકે છે.
પ્રશ્ન એ છે કે શું વેપારના નામે જાહેર રસ્તાઓ પર કબજો અને અવ્યવસ્થા ચલાવી લેવામાં આવશે? અને જો નહીં, તો જવાબદાર દુકાનદારો અને તંત્ર સામે કાર્યવાહી ક્યારે થશે?
