રગ્બી રમતમાં ગુજરાતનો ઐતિહાસિક ડંકો

ગુજરાતના રમતગમત ક્ષેત્રે વધુ એક ઐતિહાસિક સિદ્ધિ નોંધાઈ છે. કચ્છ જિલ્લાની પ્રતિભાશાળી ખેલાડી નમ્રતા ભુડિયાની ભારતીય અંડર-૧૮ ગર્લ્સ રગ્બી ટીમમાં પસંદગી થઈ છે. આ સિદ્ધિ સાથે નમ્રતા આંતરરાષ્ટ્રીય સ્તરે ભારતનું પ્રતિનિધિત્વ કરનાર ગુજરાતની પ્રથમ રગ્બી ખેલાડી બની ગઈ છે. નમ્રતા આગામી ૫ અને ૬ સપ્ટેમ્બર ૨૦૨૬ના રોજ ચીનના ક્વિંગદાઓ ખાતે યોજાનારી “Asia Rugby Emirates U-18 Sevens 2026” આંતરરાષ્ટ્રીય રગ્બી સ્પર્ધામાં ટીમ ઇન્ડિયા તરફથી મેદાનમાં ઉતરશે.

કચ્છના ગ્રાસરૂટથી શરૂ થયેલી સફર ગાંધીનગર અને ગાંધીનગરથી ટીમ ઇન્ડિયા સુધી પહોંચી

વર્ષ ૨૦૧૯માં કચ્છની શાળામાં ગ્રાસરૂટ સ્તરની પસંદગી દરમિયાન કોચ શ્રી વેદાંત ધાનાણીએ નમ્રતાની પ્રતિભા ઓળખી તેને રગ્બીનું માર્ગદર્શન આપ્યું હતું. પિતા શ્રી દિનેશભાઈ ભુડિયા અને પરિવારના સતત પ્રોત્સાહન સાથે નમ્રતાએ રમત પ્રત્યે સમર્પણ દર્શાવ્યું હતું. નમ્રતા વર્ષ ૨૦૨૧થી પાટનગર ગાંધીનગર ખાતે સ્થાયી થઈને રાષ્ટ્રીય સ્તરની સ્પર્ધાઓમાં ઉત્કૃષ્ટ પ્રદર્શન કરવા માટે કઠિન ટ્રેનિંગ મેળવી રહી છે. છેલ્લા ત્રણ વર્ષથી તે ભારતીય રાષ્ટ્રીય ટીમના ટ્રેનિંગ કેમ્પનો પણ ભાગ રહી છે. આ સમગ્ર સફરમાં રગ્બી ગુજરાત એસોસિએશનના સ્થાપક અને સેક્રેટરી ડૉ. દીપ રાવલે પણ તેને સતત માર્ગદર્શન અને કોચિંગ પૂરું પાડ્યું છે.

U-18 નેશનલ્સમાં સર્વોચ્ચ સ્કોરર અને ઉત્કૃષ્ટ સુકાની

તાજેતરમાં હૈદરાબાદ ખાતે આયોજિત U-18 ઇન્ડિયન નેશનલ રગ્બી ચેમ્પિયનશિપમાં નમ્રતાએ શાનદાર રમત દાખવીને ટુર્નામેન્ટની ‘સર્વોચ્ચ સ્કોરર’ બનવાનું બહુમાન મેળવ્યું હતું. આ સિવાય તેણે ગુજરાતની જુનિયર ગર્લ્સ અને સિનિયર વિમેન્સ રગ્બી ટીમનું સફળતાપૂર્વક કેપ્ટન તરીકે નેતૃત્વ પણ કર્યું છે. નમ્રતાની આ ઐતિહાસિક સિદ્ધિ બદલ રગ્બી ગુજરાત એસોસિએશને તેને, તેના પરિવારને તથા કોચિંગ સ્ટાફને અભિનંદન પાઠવ્યા છે. ગાંધીનગર હેડ ઓફિસ દ્વારા નમ્રતા ભુડિયા અને સમગ્ર ભારતીય અંડર-૧૮ રગ્બી ટીમને આંતરરાષ્ટ્રીય મંચ પર શ્રેષ્ઠ પ્રદર્શન માટે હાર્દિક શુભેચ્છાઓ પાઠવવામાં આવી છે.