ગાંધીનગર જિલ્લામાં ઉંદર પકડવાની ‘ગ્લુ ટ્રેપ’ ના ઉત્પાદન, વેચાણ અને ઉપયોગ પર પ્રતિબંધ: જિલ્લા મેજિસ્ટ્રેટનું જાહેરનામું

ગાંધીનગર જિલ્લામાં ઉંદર પકડવા માટે સામાન્ય રીતે ઉપયોગમાં લેવાતી ગુંદરવાળી જાળ એટલે કે ‘ગ્લુ ટ્રેપ’ ના ઉત્પાદન, વેચાણ તથા ઉપયોગ પર સદંતર પ્રતિબંધ મૂકતું જાહેરનામું જિલ્લા મેજિસ્ટ્રેટ શ્રી રવિન્દ્ર ખતાલે દ્વારા બહાર પાડવામાં આવ્યું છે. આ આદેશ તા. ૧૫/૦૭/૨૦૨૬ થી તા. ૧૨/૦૯/૨૦૨૬ સુધી સમગ્ર ગાંધીનગર જિલ્લામાં, જેમાં ગાંધીનગર મ્યુનિસિપલ કોર્પોરેશનમાં સમાવિષ્ટ વિસ્તારો, ગાંધીનગર ગ્રામ્ય તેમજ તમામ નગરપાલિકા વિસ્તારોનો સમાવેશ થાય છે ત્યાં કડક રીતે લાગુ રહેશે.

ગુજરાત પ્રાણી કલ્યાણ બોર્ડ, ગાંધીનગરના પત્ર અને નામદાર ગુજરાત હાઈકોર્ટમાં થયેલ Writ Petition (PIL) 28/2024 ના ઓરલ ઓર્ડરના સંદર્ભે ‘પ્રાણી ક્રૂરતા નિવારણ અધિનિયમ-૧૯૬૦’ ની જોગવાઈઓનો ચૂસ્તપણે અમલ કરવા આ નિર્ણય લેવાયો છે. પ્રાણી ક્રૂરતા નિવારણ અધિનિયમની કલમ-૧૧ મુજબ કોઈપણ પ્રાણીને બિનજરૂરી પીડા કે વેદના આપવા અંગે પ્રતિબંધ છે.

ઉલ્લેખનીય છે કે,ગ્લુ ટ્રેપ વાળી સપાટી પર જ્યારે ઉંદર ફસાય છે ત્યારે તે પોતાની રીતે મુક્ત થઈ શકતો નથી, જેના પરિણામે ડીહાઈડ્રેશન, ભૂખમરો અને ગૂંગળામણના કારણે તેનું અત્યંત પીડાદાયક મૃત્યુ થાય છે. આ અમાનવીય પ્રથા અટકાવવા માટે સભ્ય સચિવશ્રી, જિલ્લા પ્રાણી ક્રૂરતા નિવારણ સોસાયટી અને મદદનીશ પશુપાલન નિયામકશ્રી, ગાંધીનગર દ્વારા કરવામાં આવેલી દરખાસ્તને ધ્યાને લઈને જિલ્લા મેજિસ્ટ્રેટ દ્વારા ભારતીય નાગરિક સુરક્ષા સંહિતા, ૨૦૨૩ ની કલમ-૧૬૩ હેઠળ મળેલી સત્તાની રૂએ આ પ્રતિબંધાત્મક આદેશ જાહેર કરવામાં આવ્યો છે. આ જાહેરનામાનો ભંગ કરનાર કોઈ પણ વ્યક્તિ કે સંસ્થા ભારતીય ન્યાય સંહિતાની કલમ-૨૨૩ મુજબ શિક્ષાને પાત્ર થશે.