ગાંધીનગર જિલ્લાની હોટલ, ગેસ્ટ હાઉસ અને ધર્મશાળાઓએ ‘PATHIK’ સોફ્ટવેરમાં મુસાફરોની વિગતો નોંધાવવી ફરજિયાત

ગાંધીનગર તા.૧૫ જુલાઈ- આજના આધુનિક યુગમાં વધતી ટેકનોલોજી અને મુસાફરીની સુવિધાઓનો લાભ લઈને અન્ય રાજ્યો કે શહેરોના ગુનેગારો, આતંકવાદીઓ કે અસામાજિક તત્વો હોટલ, ગેસ્ટ હાઉસ કે ધર્મશાળાઓમાં આશ્રય મેળવીને ગુનાહિત પ્રવૃત્તિઓને અંજામ આપતા હોય છે. આવા તત્વો પર કડક દેખરેખ રાખવા, રાષ્ટ્રીય સુરક્ષા સુનિશ્ચિત કરવા અને જાહેર સલામતી જાળવવા માટે ગાંધીનગર જિલ્લાના ઇન્ચાર્જ જિલ્લા મેજીસ્ટ્રેટ શ્રી જે.એસ. પ્રજાપતિ દ્વારા સમગ્ર ગાંધીનગર જિલ્લાની હદમાં આવતી તમામ હોટલો, ગેસ્ટ હાઉસ અને ધર્મશાળાઓ માટે આદેશો જારી કરવામાં આવ્યા છે.
આદેશ અનુસાર જિલ્લાની દરેક હોટલ, ગેસ્ટ હાઉસ અને ધર્મશાળાના રિસેપ્શન કાઉન્ટર પર ઇન્ટરનેટ કનેક્ટિવિટી સાથેનું એક કોમ્પ્યુટર રાખવું ફરજિયાત છે. પોલીસ તંત્ર દ્વારા તૈયાર કરાયેલ PATHIK સોફ્ટવેર ઇન્સ્ટોલ કરી, તેમાં આવનાર દરેક મુસાફરની એન્ટ્રી કરવાની રહેશે. સંચાલકોએ દરેક મુસાફરને પોતાના જ હસ્તાક્ષરમાં રજીસ્ટરમાં વિગતો નોંધાવવી. રજીસ્ટરમાં મુસાફરની સહી સાથે પુરુષ મુસાફરના ડાબા હાથના અને સ્ત્રી મુસાફરના જમણા હાથના અંગુઠાનું નિશાન લેવાનું રહેશે. રજિસ્ટરમાં મુસાફરનું નામ, મોબાઈલ નંબર, વાહનનો રજીસ્ટ્રેશન નંબર તેમજ નજીકમાં રહેતા કોઈ પરિચિત/સગાનું નામ-સરનામું લખાવવું ફરજિયાત છે.
સંચાલકોએ મુસાફરોના ઓળખ કાર્ડની સ્વ પ્રમાણિત નકલ રાખવાની રહેશે. આ ઉપરાંત, હોટલમાં પ્રવેશતા અને બહાર જતા ગ્રાહકોના ચહેરા સ્પષ્ટ દેખાય તે રીતે સીસીટીવી કેમેરા ઇન્સ્ટોલ કરવાના રહેશે. ટૂંકા રોકાણ અને સામાન વગરના ગ્રાહકો અંગે પણ ખાસ સૂચના અનુસાર જો કોઈ યુવક કે યુવતી કોઈપણ સામાન કે બેગ વગર આવ્યા હોય અને ૩ કલાક કે તેથી ઓછા સમયમાં રૂમ છોડીને જાય, તો તેમના નામ-સરનામા અને મોબાઈલ નંબર સાથે તાત્કાલિક સ્થાનિક પોલીસ સ્ટેશનને જાણ કરવાની રહેશે. લાયસન્સ ધરાવતા મૂળ માલિક સિવાય અન્ય કોઈ વ્યક્તિ હોટલનું સંચાલન કરી શકશે નહીં. હોટલ-ગેસ્ટ હાઉસને દિવાની હક્કથી એટલે કે ભાડે કે ગીરો ખતથી અન્ય કોઈને સુપ્રત કરવા પર મનાઈ છે. વળી, નક્કી કરેલા ભાડા કરતાં ઓછું ભાડું લઈ શકાશે નહીં.
હોટલ, ગેસ્ટ હાઉસ કે ધાબાના માલિકોએ પોતાના તમામ સ્ટાફ/કર્મચારીઓના નામ, સરનામા, આંગળાની છાપ અને તેમની અન્ય સાથી હોટલોની વિગતો સંબંધિત પોલીસ સ્ટેશન અને મેજીસ્ટ્રેટ કચેરીએ લેખિતમાં જમા કરાવવાની રહેશે. કોઈ પણ શંકાસ્પદ વ્યક્તિ જણાય તો તુરંત પોલીસને જાણ કરવાની રહેશે. આ હુકમ તા. ૧૨/૦૯/૨૦૨૬ સુધી સમગ્ર ગાંધીનગર જિલ્લામાં અમલમાં રહેશે. આ જાહેરનામાના નિયમોનો ભંગ કરનાર વ્યક્તિ શિક્ષાને પાત્ર રહેશે.