શેરબજાર માટે શુક્રવાર બન્યો ગુડફ્રાઈડે, સેન્સેક્સ રેકોર્ડ સપાટીએ પહેલી વખત 60,000ને પાર

ભારતીય શેરબજારમાં આવેલી તેજીના કારણે છેલ્લા એક વર્ષથી નવા નવા રેકોર્ડ બની રહ્યા છે. સેન્સેક્સ અને નિફ્ટી સમયાંતરે નવી ઐતિહાસિક સપાટી રચવાના રેકોર્ડ બનાવે છે. સેન્સેક્સ 60,000ને પાર થઈ ગયું છે. જ્યારે નિફ્ટી 18,000 પોઈન્ટની બનાવવાની નજીક છે. ગુરુવારે 23 સપ્ટેમ્બરે સેન્સેક્સ 958 અંક વધી 59885 પર બંધ રહ્યો હતો ત્યારે 24 સપ્ટેમ્બરનો શુક્રવાર શેરબજાર માટે ગુડ ફ્રાઈડે સાબિત થયો છે.

બ્લેક ફ્રાઈડે જોઈ લીધો, હવે ગુડ ફ્રાઈડે
સ્ટોક માર્કેટ સાથે સંકળાયેલા લોકોના જણાવ્યા પ્રમાણે ભારતીય શેર બજારમાં શુક્રવારે કડાકો બોલે તો તેના માટે ‘બ્લેક ફ્રાઈડે શબ્દ પ્રચલિત છે અને બજારે અનેકવાર બ્લેક ફ્રાઈડે જોઈ પણ લીધો છે. વર્તમાન સંજોગોમાં સેન્સેક્સ 60,000ની સપાટી પર પહોંચી ગયો છે આ સાથે જ 24 સપ્ટેમ્બરની તારીખ શેરબજાર માટે ઐતિહાસિક બની ગઈ છે અને તેને માર્કેટમાં ગુડ ફ્રાઈડે તરીકે હમેશા યાદ રાખવામાં આવશે.

નાના રોકાણકારો તેજીને બળ આપી રહ્યા છે
ઇન્વેસ્ટમેન્ટ પોઈન્ટના નિખિલ ભટ્ટે કહ્યું કે માર્કેટમાં જે પ્રકારે તેજી આવી છે તેના કારણે અગાઉ જેઓ રોકાણ નહોતા કરી શક્યા તેઓ પણ હવે પોતાની ફિક્સ ડિપોઝિટીમાંથી રૂપિયા કાઢી શેરબજારમાં ઇન્વેસ્ટ કરી રહ્યા છે. નાના રોકાણકારો મિડકેપ અને સ્મોલકેપ શેર્સમાં રોકાણ કરી રહ્યા છે તે જોતાં સેન્સેક્સ 60,000 અને નિફ્ટી 18,000 થઈ શકે છે. આ સાથે જ જો આવતા દિવસોમાં નિફ્ટી 17,500નું લેવલ ન તોડે તો 18,200નો નવો હાઇ પણ જોવા મળી શકે છે.

શેરબજારમાં લિકવિડિટીનો પ્રશ્ન હલ થઈ ગયો છે
નિખિલ ભટ્ટે જણાવ્યું કે, ભારતીય શેરબજારમાં લિકવિડિટીનો પ્રશ્ન હતો તે હલ થઈ ગયો છે. કોરોના આવ્યા પછી જે મંદી આવી હતી તે હવે ધંધા રોજગાર શરૂ થઈ જવાથી દૂર થઈ છે. સેન્સેક્સ અને નિફ્ટી બેઝ્ડ બ્લૂ ચિપ શેર્સમાં વિદેશી સંસ્થાઓની સાથે સાથે સ્થાનિક ફાંદોની પણ સારી એવી ખરીદી રહે છે. પબ્લિક ઇશ્યૂ પણ ઓવર સબ્સ્ક્રાઇબ થઈ રહ્યા છે અને સ્મોલકેપ તથા મિડકેપમાં પણ બહોળી લેવાલી છે.

વીતેલા એક વર્ષમાં સેન્સેક્સની સફર

મહિનો સેન્સેક્સ
સપ્ટેમ્બર 2020 38,067.93
જાન્યુઆરી 2020 46,285.77
એપ્રિલ 2021 48,782.36
જૂન 2021 52,482.71
સપ્ટેમ્બર 2021 59,885.36
સંદર્ભ: BSE

તેજીની સાથે સાથે કરેક્શન પણ આવી શકે છે
ઈન્વેસ્ટ અલાઈન સિક્યુરિટીઝના કો-ફાઉન્ડર ગુંજન ચોકસીએ જણાવ્યું હતું કે વર્તમાન બજાર પ્રવાહમાં, તેજીને મજબૂત ટેકો મળી રહ્યો છે. આવા સમયે ઇન્ડેક્સ અને સેકટોરલ મૂવમેન્ટ પર ધ્યાન રાખવું ખૂબ જરૂરી છે. બજાર અત્યારે સર્વોચ્ચ સપાટીએ છે અને શુક્રવારે પણ તે તેજી સાથે જ ખૂલે તેવી પૂરી સંભાવના છે. એક લેવલ પછી માર્કેટમાં કરેક્શન આવશે. આખરે હંમેશા યાદ રાખવું જોઈએ કે બુલ રન ગમે તેટલી મજબૂત હોય, પ્રોફિટ બૂકિંગની શરૂઆત માટે એક નકારાત્મક મુદ્દો જ કાફી છે.

માર્કેટમાં રોજના 1 લાખથી વધુ નવા રોકાણકારો આવી રહ્યા છે
ભારતીય શેરબજારોમાં છેલ્લા એક-દોઢ વર્ષથી અવિરત તેજી જોવા મળી રહી છે. બોમ્બે સ્ટોક એક્સચેન્જ (BSE)નો સૂચકઆંક સેન્સેક્સ 60,000 પોઈન્ટની નજીક પહોંચી ગયો છે ત્યારે સ્ટોક માર્કેટ તરફ લોકોનું વલણ બદલાયું છે. બજારમાં આવેલી તેજીને પગલે રોકાણકારોનું આકર્ષણ પણ વધ્યું છે. 21 સપ્ટેમ્બર સુધીમાં BSE પર રજિસ્ટર્ડ ઈન્વેસ્ટર્સની સંખ્યા 8 કરોડ પર પહોંચી છે. વીતેલા એક વર્ષ દરમિયાન ભારતીય શેરબજારમાં 2.54 કરોડ નવા રોકાણકારો આવ્યા છે. આ હિસાબે માર્કેટમાં રોજના 1 લાખથી વધુ નવા રોકાણકારોનો ઉમેરો થયો છે (ટ્રેડિંગ દિવસોના હિસાબે).