ગુજરાતમાં મેઘમહેર યથાવત: 7 દિવસ વરસાદની આગાહી, દક્ષિણ ગુજરાતમાં યલો એલર્ટ
ગુજરાતમાં ચોમાસાની શરૂઆતથી જ સતત વરસાદ વરસી રહ્યો છે અને હવામાન વિભાગે આગામી 7 દિવસ માટે વરસાદની આગાહી કરી છે. આજે (૧૦ જુલાઈ) દક્ષિણ ગુજરાતના કેટલાક વિસ્તારોમાં છૂટોછવાયો ભારે વરસાદ થવાની સંભાવના છે, જેને લઈને વલસાડ, નવસારી, દમણ અને દાદરા નગરહવેલી માટે યલો એલર્ટ (Yellow Alert) જાહેર કરાયું છે. 40 થી 50 કિ.મી. પ્રતિ કલાકની ઝડપે પવન ફૂંકાવાની શક્યતા હોવાથી આગામી 3 દિવસ માટે માછીમારોને દરિયો ન ખેડવા સૂચના અપાઈ છે.
અમદાવાદ શહેરમાં પણ વાદળછાયું વાતાવરણ જોવા મળ્યું છે, જેના કારણે હળવા વરસાદની શક્યતાઓ છે. દક્ષિણના જિલ્લાઓમાં ૧૭ જુલાઈ સુધી હળવા વરસાદની આગાહી છે, જ્યારે સૌરાષ્ટ્રમાં પણ ભારે વરસાદની શક્યતા છે. જોકે, દરિયાકાંઠાની નજીકના વિસ્તારોમાં ૧૦ જુલાઈ બાદ વરસાદનું જોર ઘટી શકે છે. છેલ્લા ૨૪ કલાકમાં રાજ્યના ૧૨૬ તાલુકામાં સારો વરસાદ નોંધાયો છે, જેમાં તાપીના કુકરમુંડામાં ૨.૪૦ ઇંચ, નિઝરમાં ૨.૫ ઇંચ અને સુરતના ઉમરપાડામાં ૧.૫૭ ઇંચ વરસાદ પડ્યો છે. જૂન મહિનામાં ગુજરાતમાં સરેરાશ ૪.૪૩ ઇંચની જરૂરિયાત સામે ૧૧.૫૫ ઇંચ વરસાદ ખાબક્યો છે, જે ખેડૂતો માટે આશીર્વાદરૂપ સાબિત થયો છે.
