અમેરિકા: વિઝા રદ થવાનું જોખમ વધ્યું: કાયદેસર વિઝાધારકો પણ નિશાના પર
વોશિંગ્ટન: અમેરિકાના પ્રમુખ ડોનાલ્ડ ટ્રમ્પના પ્રશાસને દેશમાં રહેતા વિદેશીઓ સામે કડક કાર્યવાહી શરૂ કરી છે. આ માટે, જેમની પાસે કાયદેસર યુએસ વિઝા છે તેવા ૫.૫ કરોડથી વધુ વિદેશીઓની ઝીણવટભરી તપાસ કરવામાં આવી રહી છે. જે પણ વિઝા ધારક નિયમોનું ઉલ્લંઘન કરતા જણાશે, તેમને દેશનિકાલ કરવામાં આવશે. આ કાર્યવાહીનો મુખ્ય ઉદ્દેશ્ય ગેરકાયદેસર રીતે રહેતા અને નિયમભંગ કરનારા લોકોને દેશમાંથી બહાર કાઢવાનો છે.
અમેરિકી વિદેશ મંત્રાલયે સ્પષ્ટતા કરી છે કે તમામ વિઝા ધારકોની સતત તપાસ કરવામાં આવે છે. જો કોઈ વ્યક્તિ નિર્ધારિત સમય કરતાં વધુ રોકાય, ગુનાહિત પ્રવૃત્તિમાં સામેલ થાય, જાહેર સુરક્ષા માટે જોખમ ઊભું કરે અથવા આતંકવાદી ગતિવિધિઓ સાથે સંકળાયેલો હોય, તો તેનો વિઝા ગમે ત્યારે રદ થઈ શકે છે. આ નવી નીતિ હેઠળ, કાયદેસર રીતે રહેતા લોકોના વિઝા પણ અચાનક રદ થવાનું જોખમ વધી ગયું છે.
આ ઉપરાંત, ટ્રમ્પ પ્રશાસને કોમર્શિયલ ટ્રક ડ્રાઈવરો માટે વર્ક વિઝા આપવાનું બંધ કરી દીધું છે અને તેમને અંગ્રેજી બોલવા અને વાંચવાની ફરજિયાત જરૂરિયાત લાગુ કરી છે. આ નિર્ણયનો હેતુ અમેરિકન નાગરિકોની નોકરીનું રક્ષણ કરવા અને માર્ગ સલામતી સુધારવાનો છે.
