ગાંધીનગર નજીક રોડ અકસ્માત: ટ્રેક્ટરે બાઈકને ટક્કર મારતા આધેડનું મોત

ગાંધીનગર: ગાંધીનગર નજીકના પીપળજ ગામ પાસે માર્ગ અકસ્માતની વધુ એક ઘટના બની છે, જેમાં ટ્રેક્ટરની ટક્કરથી બાઈક પર સવાર એક આધેડનું મોત થયું છે. આ ઘટના ગુરુવારે બની હતી અને ઈજાગ્રસ્તોને સારવાર માટે હોસ્પિટલમાં ખસેડવામાં આવ્યા હતા. જોકે, સારવાર દરમિયાન એક વ્યક્તિનું મૃત્યુ થયું છે. પેથાપુર પોલીસે આ મામલે ગુનો દાખલ કરીને ટ્રેક્ટર ચાલકની શોધખોળ શરૂ કરી છે. પોલીસ સૂત્રો દ્વારા મળતી માહિતી મુજબ, પીપળજ ગામ ના રહેવાસી પ્રથમેશ દિલીપભાઈ જાની અને દિનેશસિંહ ભવનજી વાઘેલા બાપુપુરાથી પોતાના ગામ તરફ બાઈક પર જઈ રહ્યા હતા. જ્યારે તેઓ માધવ ગૌશાળા નજીકથી પસાર થઈ રહ્યા હતા, ત્યારે અચાનક એક ટ્રેક્ટર ખેતરમાંથી રોડ પર આવ્યું અને બાઈકને જોરદાર ટક્કર મારી.અકસ્માતમાં પ્રથમેશ અને દિનેશસિંહ બંને ગંભીર રીતે ઘાયલ થયા હતા. ઘટનાસ્થળે પહોંચેલા લોકોએ 108 એમ્બ્યુલન્સની મદદથી બંનેને તાત્કાલિક હોસ્પિટલ પહોંચાડ્યા. દિનેશસિંહની હાલત ગંભીર હોવાથી તેમને વધુ સારવાર માટે અમદાવાદ સિવિલ હોસ્પિટલ લઈ જવામાં આવ્યા હતા, પરંતુ દુર્ભાગ્યવશ સારવાર દરમિયાન તેમનું અવસાન થયું.આ ઘટના બાદ, પ્રથમેશ જાનીએ પેથાપુર પોલીસ સ્ટેશનમાં ટ્રેક્ટર ચાલક વિરુદ્ધ ફરિયાદ નોંધાવી છે. પોલીસે ગુનો દાખલ કરીને ટ્રેક્ટર ચાલકની ઓળખ કરી તેને પકડવા માટે વધુ તપાસ હાથ ધરી છે.