ગાંધીનગરમાં ‘વાઇબ્રન્ટ ગુજરાત રિજનલ કોન્ફરન્સ’ સંપન્ન: રૂ. ૧૩૦ કરોડના ૧૦ MOU સાઇન, રોજગારીની નવી તકો સર્જાશે
ગુજરાતમાં ઔદ્યોગિક વિકાસ, મૂડીરોકાણ અને રોજગારની તકોને નવી ઊંચાઈઓ પર લઈ જવાના આશય સાથે રાજ્ય સરકાર દ્વારા આયોજિત “વાઇબ્રન્ટ ગુજરાત રિજનલ કોન્ફરન્સ – જિલ્લા કક્ષાનો કાર્યક્રમ” આજે હોટેલ ધ લીલા, ગાંધીનગર ખાતે સફળતાપૂર્વક સંપન્ન થયો હતો. આ કાર્યક્રમમાં ગાંધીનગર જિલ્લાને ઔદ્યોગિક હબ બનાવવાના સંકલ્પ સાથે ઉદ્યોગકારો અને મહાનુભાવોની પ્રેરક ઉપસ્થિતિ રહી હતી.
આ કોન્ફરન્સમાં મેયરશ્રી મીરાબેન પટેલએ જણાવ્યું હતું કે, વડાપ્રધાનશ્રી નરેન્દ્રભાઈ મોદીના દુરંદેશી નેતૃત્વ હેઠળ શરૂ થયેલી વાયબ્રન્ટ ગુજરાત પહેલે રાજ્યને વૈશ્વિક રોકાણના નકશા પર આગવી ઓળખ અપાવી છે. મુખ્યમંત્રી શ્રી ભુપેન્દ્રભાઈ પટેલના માર્ગદર્શન હેઠળ રાજ્ય સરકાર “વિકસિત ગુજરાત-વિકસિત ભારત ૨૦૪૭”ના સંકલ્પને સાકાર કરવા પ્રતિબદ્ધ છે. ગાંધીનગર જિલ્લો સુશાસન, આધુનિક ઇન્ફ્રાસ્ટ્રક્ચર, ડિજિટલ પરિવર્તન અને જ્ઞાન આધારિત અર્થતંત્રનું મહત્વપૂર્ણ કેન્દ્ર છે. ત્યારે વિકસિત ગુજરાત ઇન્ડસ્ટ્રિયલ પોલિસી–૨૦૨૬’ ના માધ્યમથી રાજ્યમાં વધુ રોકાણ અને રોજગારના નવા અવસરો ઊભા થશે, જે વડાપ્રધાનશ્રીના ‘વિકસિત ભારત–૨૦૪૭’ ના વિઝનને સાકાર કરવામાં મહત્વની ભૂમિકા ભજવશે. મેયરશ્રીએ ઉદ્યોગપતિઓ અને રોકાણકારોને ગાંધીનગર તથા મધ્ય ગુજરાતમાં ઉપલબ્ધ રોકાણની તકોનો લાભ લઈ રોજગારી અને આર્થિક વિકાસને વેગ આપવા અનુરોધ કર્યો હતો. કાર્યક્રમમાં ગાંધીનગર જિલ્લા કલેક્ટરશ્રીએ ઉપસ્થિત મહાનુભાવોનું સ્વાગત કરતાં જિલ્લામાં રહેલી ઔદ્યોગિક ક્ષમતાઓ, આધુનિક ઇન્ફ્રાસ્ટ્રક્ચર અને રોકાણની વિપુલ તકો અંગે વિગતવાર માર્ગદર્શન પૂરું પાડ્યું હતું. આ પ્રસંગે વાઇબ્રન્ટ ગુજરાત રિજનલ કોન્ફરન્સ અને રાજ્યની પ્રગતિ દર્શાવતી એક વિશેષ માહિતીસભર AV ફિલ્મ પણ રજૂ કરવામાં આવી હતી.
આ કોન્ફરન્સનું મુખ્ય આકર્ષણ જિલ્લામાં થનારા નવા રોકાણો રહ્યા હતા. વિવિધ ક્ષેત્રના અગ્રણી ઉદ્યોગકારો વચ્ચે કુલ રૂ. ૧૩૦ કરોડના મૂલ્યના ૧૦ ઇન્વેસ્ટમેન્ટ ઇન્ટેન્શન / એમ.ઓ.યુ. ની આપ-લે કરવામાં આવી હતી. આ રોકાણો ગાંધીનગર જિલ્લામાં નવી રોજગારીનું સર્જન કરવા અને સ્થાનિક અર્થતંત્રને મજબૂત બનાવવામાં સીમાચિહ્નરૂપ સાબિત થશે. કાર્યક્રમમાં રાજ્ય સરકારના પ્રતિનિધિ દ્વારા ‘વિકસિત ગુજરાત ઇન્ડસ્ટ્રિયલ પોલિસી–૨૦૨૬’અંગે વિસ્તૃત પ્રેઝન્ટેશન અને શોર્ટ ફિલ્મ રજૂ કરવામાં આવી હતી. વિવિધ ઉદ્યોગ સંગઠનોના પ્રતિનિધિઓએ પણ સરકારની ઉદ્યોગલક્ષી અને સાનુકૂળ નીતિઓને મુક્તમને બિરદાવી હતી.
કોન્ફરન્સના દ્વિતીય તબક્કામાં દેશના ખ્યાતનામ વિષય નિષ્ણાતો દ્વારા વિવિધ બિઝનેસ મોડલ્સ અને યોજનાઓ અંગે વિસ્તૃત ટેકનિકલ સત્રો યોજાયા હતા, જેમાં મુખ્યત્વે વૈશ્વિક ટેક ટ્રેડ તકો અને ટેક્સટાઇલ નિકાસ વૃદ્ધિ, MSME સહાય યોજનાઓ અને RAMP ગુજરાત માઇક્રો ઇન્ક્યુબેશન પ્રોજેક્ટ, MSME માટે સ્માર્ટ રિટાયરમેન્ટ સોલ્યુશન, ગુણવત્તા સુધારણા, ઉદ્યોગસાહસિકતા અને કુશળતા વિકાસ, નિકાસ જાગૃતિ વિષયોને આવરી લેવામાં આવ્યા હતા. સ્થાનિક કૌશલ્ય અને ઇનોવેશનને પ્રોત્સાહન આપવા માટે કાર્યક્રમ સ્થળે ખાસ પ્રદર્શનનું આયોજન કરાયું હતું. જેમાં કુલ ૨૦ જેટલા વિવિધ ઉદ્યોગો, સ્ટાર્ટઅપ્સ અને ઇન્વેસ્ટમેન્ટ પ્રોમોશન એજન્સીઓએ પોતાના સ્ટોલ પ્રદર્શિત કર્યા હતા. આ મંચ દ્વારા નવા ઉભરતા સ્ટાર્ટઅપ્સને પોતાની અદ્યતન પ્રોડક્ટ્સ અને સેવાઓનું બ્રાન્ડિંગ કરવાની ઉત્કૃષ્ટ તક મળી હતી. આ ભવ્ય કાર્યક્રમમાં જિલ્લા વિકાસ અધિકારીશ્રી હસરત જાસ્મીન, જિલ્લા પંચાયત પ્રમુખશ્રી રાજેશ પટેલ સહિત વિવિધ ઔદ્યોગિક એસોસિએશનના હોદ્દેદારો, અગ્રણી ઉદ્યોગપતિઓ, રોકાણકારો અને મોટી સંખ્યામાં નાગરિકો ઉત્સાહભેર સહભાગી થયા હતા.
